መልክዓ ቅዱስ እግዚአብሔር አብ

በስመአብ ወወልድ ወመንፈስቅዱስ አሐዱ አምላክ አሜን።

“መቅድመ ኩሉ ንሰብክ ሥላሴ ፅሩየ፡ ከሁሉ አስቀድመን የሥላሴን አንድነትና ሦስትነት እናስተምራለን።”  (ቅዱስ ቄርሎስ)

 

መልክዓ ቅዱስ እግዚአብሔር አብ

(በከሣቴ ብርሃን ማተሚያ ቤት በ1957 ዓ.ም  ታተመ። በድጋሚ በህዳር 1994 ዓ.ም በኢ.ዲ.ኤም ማተሚያ ቤት ታተመ።)

እሰግድ ለመለኮትከ እንተ ፈጠርከ ጽልመተ። እምቅድመ ትግበር ብርሃነ ወታስተባሪ መዓልተ። እግዚአብሔር አሐዱ እንተ ኢኮንከ ክልኤተ። በስምሰ ሰመዩከ ሠለስተ። እንዘ በመለኮት ዋኅድ ወብሑት አንተ።

እሰግድ ለመለኮትከ ዘሳረርከ ምድረ። ለዕጓለ እመሕያው ይኩን ወለእንስሳ ማህደረ። እግዚአብሔር ገባሬ እንበለ ትኅሥሥ መምክረ። ትፀውር ድደ በኃይልከ እንዘ ትነብር ጠፈረ። ወእንዘ ተሐንፅ መሠረተ ትፄአን ቀመረ።

እሰግድ ለመለኮትከ በኃይለ አርምሞ እንበለ ድምፅ። ለጠባይዓ ማይ አምጻእኮ እምኀበ ኢምንት አንቀጽ። እግዚአብሔር ርቱዕ ዘኢታደሉ ለገጽ። ፍታኅ ሊተ እግዚኦ እምነ እኩያን አብያጽ። ወተበቀል በቀልየ በግሩም ተግሣፅ። 

እሰግድ ለመለኮትከ ፈጣሬ እሳት ውዑይ። እንበለ እሳት ካልዕ ውስተ ከርሰ ቁሪር ቀላይ። እግዚአብሔር አብ እንተ ተአቅብ በማይ። አዳም ግብርከ እግዚአ ወኩሉ ሠናይ። በኀልዮቱ እትፌሣህ ገብርከ ነዳይ። 

እሰግድ ለመለኮትከ እንተ ፈጠርከ ነፋስ። ወቦቱ ገበርከ ለጠባይዓ ማይ ቅዱሰ። እግዚአብሔር ምዕረ ካዕበ ወስልሰ። አስተንፍስ ውስተ አፉየ መዓዛ ሕይወት ሐዲስ። እም ሕማመ ሥጋ ወነፍስ ዘይከውን ፈውሰ።

እሰግድ ለመለኮትከ ገባሬ መላእክት እምተደሞ። ወምሳሌሆሙ አዳም እንበለ ነቢብ ወአርምሞ። እግዚአብሔር ኃይልየ ወሐዳፌ ነፍስየ እምተሰጥሞ። ድካምየ ትፁር ኂሩትከ ወለልብየ ሕማሞ። ከመ ወላዲቱ ለወልዳ ትፀውር ድካሞ።

እሰግድ ለመለኮትከ እንተ ፈጠርከ ቀዳሚ። ሰማየ አርያም ኅቡዓ እምባሕርየ ምስጢር ኢተተርጓሚ። እግዚአብሔር በእሁድ ወጣኔ ፍጥረት ወፈጻሚ። እስዕን ፈክሮተከ በሕሊናየ ቀዋሚ። ወኢይትከሃሎ ለአፉየ ባሕርየከ ይስሚ።

እሰግድ ለመለኮትከ ለራዕየ ኅቡዓት እለ ተፈጥሩ። ጠፈረ ይኩን ዘትቤ ወይጻእ እማኅደሩ። እግዚአብሔር ለከእስከነ መላእክት ገረሩ። ዲያብሎስ ወድቀ አሜሃ እምሕሊናከ መንበሩ። ወመንገለ ኃሣር ወረደ እምክብሩ።

እሰግድ ለመለኮትከ በሰዓተ ሌሊት ዘሰኑይ። ጠፈረ ይኩን ዘትቤ እንዘ ትከፍሎ ለማይ። እግዚአብሔር እምኀበ አልቦ አምጻኤ ሰመንቱ ባሕርይ። ምድረሰ አንበርከ ዲበ ባሕር ዐባይ። አመ ከመ ቀመር ሰቀልኮ ለልዑል ሰማይ።

እሰግድ ለመለኮትከ ዘአስተጋባእኮ ከመ ዝቅ። ለማየ ውቅያኖስ ግሩም ኀበ ምዕላዲሁ ዕሙቅ። እግዚአብሔር ሠራዒ ቀዳሜ ቃልከ ጽድቅ። አስተርአየት የብስ ሶቤሃ በትርሲተ ጽጌ ጽፉቅ። እምዕለተ ዕሁድ ፀዳል በሠላስ ሠርቅ።

እሰግድ ለመለኮትከ ከመ ቅጽበተ ዓይን ዘፈፀመ። አስተጋብኦ ማይ ስፉህ ድኅረ ዓለመ አስጠመ። እግዚአብሔር ከሃሊ እንተ ትገብር መድምመ። እም አይቴ ወጠንከ አሜሃ አመ ፈጠርከ ዓለመ። ወኀበ አይቴ ረሰይከ ውሳኔ ወአቅመ።

እሰግድ ለመለኮትከ ዘአሰርጎካ ከመ ልብስ። እምድኅረ ዕለታት ክልዔቱ በዕለት ሠላስ። እግዚአብሔር ለምድር በሥነ ጽጌያት ሐዳስ። አስተራእየት ጽጌ ሶቤሃ ውስተ ምድረ ሐጋይ ወየብስ። በገራኅተ ሥጋ ወነፍስ ማርያም በለስ።

እሰግድ ለመለኮትከ ለዘበኂሩቱ በቆሉ። ዘመደ ዕፀዋት በሳዕር መግቦተ ሥጋ ዘይክሉ። እግዚአብሔር ኪያከ እለ ውስተ ታሕቱ ወላእሉ። ቅዱስ ቅዱስ ቅዱስ ይብሉ። እስመ በትእዛዝከ ኮኑ ወተፈጥሩ እሉ።

እሰግድ ለመለኮትከ እንተ ተክለ በምስራቅ። ኤዶምሃ ገነተ ተድላ ወጽድቅ። እግዚአብሔር መታሪ ወገባሬ ነገር ሕሉቅ። ትሳረር ዲበ ማይ ወተሐንፅ በደቃቅ። ወትጠበልሎ ለግብር በጊሜ ረቂቅ።

እሰግድ ለመለኮትከ በዕለተ ረቡዕ ዘአርአየ። መንገለ ምዕራብ ወርኃ ወመንገለ ምስራቅ ፀሐየ። እግዚአብሔር በ{ፃ እንተ ትዌስን ቀላየ። ትኤምድ በነፋስ እንዘ ተዓርግ እምዝየ። ትሰቅል ማየ ወትሰሚ ሰማየ።

እሰግድ ለመለኮትከ ዘለሊከ ሳረርከ። እምነ ብርሃን ወነፋስ ዘከዋክብት ፈለከ። እግዚአብሔር ኀበኒ ዲናረ ተደሞ ብሩከ። በኁልቆ ዐሰርቱ ሰዓት ለዘተቀነይኩ ለከ። ምስለ እለ ፃመው ነግሃ እስከ ይከውን ሰርከ።

እሰግድ ለመለኮትከ ዘገበርከ ወርኃ በዕድሜሁ። ፀሐይኒ አእመረ ምዕራቢሁ። እግዚአብሔር ሌሊተ ዘታመጽእ በበጊዜሁ። ወቦቱ ይፃዑ አራዊተ ኀበ ገደላ ላህ በበዝኁ። እምከመ ሰረቀ ፀሐይ የአትው ናሁ።

እሰግድ ለመለኮትከ ዘፈጠረ አመ ሐሙስ። እምርጥበተ ማይ ዓሳተ ወእምነ ቆሪር የብስ። እግዚአብሔር ስፉሕ ረቂቀ ጠባይዕ እምነፋስ። እንተ ትሴባህ በውስቴታ ከመ ቤተ ፀሎት ንዑስ። እስመ ርኅበ ሰማይ ወምድር አሐቲ መቅደስ።

እሰግድ ለመለኮትከ ፈጣሬ ንዑሳን ዘይትሐወሱ። ወገባሬ እንስሳ ዓበይት በባሕረ ውቅያኖስ ማዕከለ ከርሱ። እግዚአብሔር ክድነኒ በአክናፈ ኪሩቤል ስሱ። ኢያደንግፀኒ አርዌ እንተ ይበርቅ ጢሱ። ወጽንፈ ዘነቡ ውዱደ ያሰምክ በርእሱ።

እሰግድ ለመለኮትከ እንተ ወሀብካሁ ለምስካብ። ለግሩም አርዌ ሳብዕተ እደ ማይ ርጡብ። እግዚአብሔር አሐዱ ፈጣሬ ዓለማት ዘዓርብ። ድኅረሰ ትመትሮ በሥልጣንከ ዕፁብ። ግዝፈ ፍጥረቱ ያንክሩ እለ ርእዩ ሕዝብ።

እሰግድ ለመለኮትከ በዕለተ ሰዱስ ዘፈጠረ። አባግዓ ብሔር ኩሉ ወእንስሳ ገዳም ኅቡረ። እግዚአብሔር ሎሙ ዘየአክሎሙ ሳዕረ። አስተዳሎከ ሲሳዮሙ እስከ ታመጽኦሙ ድኅረ። እስመ ከማሁ ለኩሉ ታስተዴሉ ወትረ።

እሰግድ ለመለኮትከ እምቀለመ መሬት ፀዓዳ። ዘአካለ አዳም ሰዓልከ ወለካዕከ ውስተ ሰሌዳ። እግዚአብሔር ትቤ አመ ዕለተ ዓርብ ብዝኅተ ዕዳ። ንግበር ሰብአ በአርያነ እነግዳ። መልክዓ ልቡና ውእቱ ወአኮ አነዳ።

እሰግድ ለመለኮትከ እምገቦ አዳም ድኅረ። እንተ አውፃዕካ ለሄዋን ከመ ትርድዖ  ተግባረ። እግዚአብሔር ኪያከ በዘአፀመድከ ወትረ። መኑ ያወፅእ እምልብየ ፍትወተ ዓለም ነኪረ። እንበለ ጥበብከ አምላካዊ ዘሰማየ ገብረ።

እሰግድ ለመለኮትከ ዘአእረፎሙ ለአይሁድ። በዕለተ ሰንበት ሳብዒት እምተግባረ አእጋር ወእድ። እግዚአብሔር አብ ሰንበተ ክርስቲያን አሁድ። አግዕዘኒ እምቅኔ ሥጋ ለአብጽሖ ንሰቲት ሰጊድ። ኀበ ኁልቆ ዕሥራ ወክልኤቱ ስሙያን አንጋድ።

ስብሐት ለእግዚአብሔር ለለሰርቀ ዕለተ ወለያልይ።      ስብሐት ለእግዚአብሔር በተባርዮ ክረምት ወሐጋይ።   ስብሐት ለእግዚአብሔር በወርኀ መፀው ወፀደይ።      ስብሐት ለእግዚአብሔር በኁልቆ ኩሉ ዘኢይትረዓይ።   ስብሐት ቅድምናከ ወትረ ይነግር ሰማይ።

አቡነ ዘበሰማያት ይትቀደስ ስምከ ትምጻእ መንግሥትከ ወይኩን ፈቃድከ በከመ በሠማይ ከማሁ በምድር ሲሳየነ ዘለለእለትነ ሃበነ ዮም ኅድግ ለነ አበሳነ ወጌጋየነ ከመንኅነኒ ንህድግ ለዘአበሰለነ ኢታብዓነ እግዚኦ ውስተ መንሱት አላ አድኅነነ ወባልሀነ እምኩሉ እኩይ እስመ ዚአከ ይእቲ መንግስት ኃይል ወስብሐት ለዓለመ ዓለም።

በሠላመ ቅዱስ ገብርኤል መልዓክ ኦ እግዝእትየ ማርያም ሠላም ለኪ ድንግል በህሊናኪ ወድንግል በሥጋኪ እመ እግዚአብሔር ጸባዖት ሠላም ለኪ ቡርክት አንቲ እምአንእስት ወብሩክ ፍሬ ከርስኪ ተፈስሒ ፍስሕት ኦ ምልዕተ ፀጋ እግዚአብሔር ምስሌኪ ሰዓሊ ወጸልዪ ምኅረተ ለነ ሀበ ፍቁር ወልድኪ ኢየሱስ ክርስቶስ ከመ ይስረይ ለነ ኃጣውዒነ።

ስብሐት ለአብ ስብሐት ለወልድ ስብሐት ለመንፈስቅዱስ ይዜኒ ወዘልፈኒ ወለዓለመ ዓለም። አሜን። 

የቦ/መ/ብ/ቅ/እግዚአብሔር አብ ቤ/ክ ሰ/ት/ቤት